အိမ်အပြန်လမ်းလို့ သူ့ကိုယ်သူ သတ်မှတ်ထားသော
လမ်းတစ်ခုပေါ် လူတစ်ယောက် မောပန်းတကြီးလျှောက်လာတယ်။ သူ့လက်တစ်ဖက်မှာတော့
တစုံတရာကို ကျစ်ကျစ်ပါအောင် ဆုပ်ကိုင်ထားတဲ့ပုံ …
သူ့ရင်ထဲဝင်ကြည့်နိုင်မယ်ဆိုရင် အလောတကြီး အလျင်လိုခြင်းကို ဦးစွာတွေ့ရမှာပေါ့။ ဟုတ်တယ်လေ
… သူပြန်လာမှ ညစာစားရမယ့် ကလေးတွေရဲ့ မျက်နှာလေးတွေ … ဆန်ကွဲမဖြစ်တဖြစ်
ဆန်လို့ ခေါ်တာကို ချက်ပြီး သူ ဝယ်လာမယ့် ဟင်းကို စောင့်နေမယ့် ကြင်သူ …
သူလို အလုပ်ကြမ်းသမားတစ်ယောက်အတွက်တော့ နေ့တာတွေ ရှည်လွန်းလှသည်လေ။
တစ်နေကုန် ပင်ပင်ပန်းပန်းအလုပ်လုပ်ပြီးရလာတဲ့ နေ့တွက်ခ ၅ဝဝဝ တန်တစ်ရွက်က
သူ့လက်ထဲကနေ လေမှာ လွင့်မှာစိုးတဲ့အလား ကျစ်ကျစ်ပါအောင် ဆုပ်ထားလိုက်မိတယ်။
ဒါလေးလွင့်သွားရင် ညစာခက်မယ့် မိသားစုနဲ့ ဒေါ်တုတ်ကို ပေးရမယ့်
နေ့ပြန်တိုး က ခက်ရော့ချည်မယ်မလား။ ဟင်းဝယ်မယ့် လမ်းထိပ်က ထမင်းဆိုင်လေး
မရောက်ခင် မနက်က မဒီ မှာလိုက်တာ သွားသတိရမိတယ်။ သဘက်ခါ သူ့အဒေါ် အလှူသွားရင်
ပြင်ဖို့ နှုတ်ခမ်းနီတစ်တောင့်လောက်တဲ့ …
အဲဒါနဲ့ပဲ မီးတွေ
ထိန်လင်းနေတဲ့ စတိုးဆိုင်လေး တစ်ဆိုင်ထဲ ဝင် … အရောင်းစာရေးမလေးကို မေးပြီး
နှုတ်ခမ်းနီ အနီလေးတစ်တောင့်ဝယ်လိုက်တယ်။ တစ်ရွက်တည်းသော ၅ဝဝဝ တန်ကို
ကောင်တာစားပွဲပေါ်တင်လိုက်ပြီး ဘယ်လောက်ကျလဲပေါ့။
ကောင်တာထိုင်တဲ့
ကောင်လေးက ၅ဝဝဝ တန်ကို ဟိုဘက်ဒီဘက် သေချာကြည့်ပြီး
မျက်မှောင်ကျုံ့သွားတယ်။ ခဏနော်လို့ ပြောပြီး ဆိုင်နောက်ဘက်ကို
ဝင်သွားတာကို တွေ့လိုက်တယ်။ နောက်နဲနဲကြာတော့မှ ဆိုင်ရှင်လို့ ယူဆရတဲ့
လူကြီးတစ်ယောက်ထွက်လာပြီး
“ဒီ ၅ဝဝဝ တန် မင်းဘယ်က ရတာလဲ”
“ခင်ဗျာ၊ ကျွန်တော် နေ့တွက်ခ ရလာတာပါ”
“ဒါဆို ခဏစောင့်ဦး၊ ငါ ရဲစခန်းကို အကြောင်းကြားပြီးပြီ၊ မင်း ယူလာတဲ့ ၅ဝဝဝ တန်က အတုကြီး” တဲ့။
“ဗျာ”
သူ့နားတောင် သူ မယုံနိုင်ပဲဖြစ်သွားတယ်။ နောက်ပြီး ရုတ်တရက် သူ့အတွေးမှာ
ပထမဆုံးပေါ်လာတာ သူပြန်လာမယ့် အချိန်ကို ထိုင်မျှော်နေသော ညစာ မစားရသေးတဲ့
သူ့မိသားစု …
ဘယ်လိုပဲ တောင်းပန်၊ တောင်းပန် မရပဲ နောက်ဆုံးတော့ ရဲတွေ ရောက်လာကြပြီး သူ့ကို စခန်းခေါ်သွားကြတယ်။
အခုည ဒီအချိန်မှာ Disco Light တွေ ကြား ပျော်နေမယ့်သူတွေကတော့
ပျော်နေလောက်ပြီလေ။ သူ့မှာတော့ မနက်ဖြန်အတွက် ဝေးလို့ အခု ညစာ အတွက်တောင်
ဘယ်လို ရှေ့ဆက်ရမှာလဲဆိုပြီးတော့ရယ် …
( ၅ဝဝဝ တန် အတု တွေ အကြောင်း ဖတ်မိရင်းနဲ့ အတွေးလေး ဝင်လာလို့ ခံစားရေးလိုက်တာပါ။)
No comments:
Post a Comment